På russisk vert den kalla for kamtsjatkakrabben (frå Kamtschatka-området), mens det engelske namnet er "red king crab". Kongekrabben tilhøyrer klassen krepsdyr (Crustacea) og ordenen tifotkreps (Decapoda).
Russiske forskarar sette kongekrabben ut i Murmanskfjorden på 1960-talet for å auke verdigrunnlaget for innbyggjarane i Murmansk. Krabben har sidan spreidd seg austover og vestover i det sørlege Barentshavet, og har truleg kommen for å bli.
Forsking på kva effekter kongekrabben har hatt på botnfaunaen i Varangerfjorden viser at ei rekkje organismer på blautbotn er reduserte eller heilt vekke frå område der krabben har heldt seg i store mengder over lang tid. Dette gjeld spesielt arter med liten flytteevne, til dømes børstemark, pigghuder og større muslingar.
