Havforskingsinstituttet har tradisjon for å samarbeida med tilsvarande organisasjonar i USA, spesielt NOAA (National Oceanic and Atmospheric Administration) i Seattle. For to år sidan møttest forskarane i Seattle. I år var samlinga lagt til Havforskingsinstituttet sin nyopprusta forskingsstasjon på Austevoll. Deltakarane besøkte også Forskingsstasjonen Matre, der det pågår havforsuringsstudiar på hummar og makrell.
Felles interesser
– Amerikanarane og vi har felles interesser på mange felt innan havforsuring. På sikt kan det vera aktuelt å koordinera forskingsprosjekt her og i USA, utveksla ekspertise og bruka spesialtilpassa installasjonar hos kvarandre, seier Knut Yngve Børsheim, som hadde ansvar for symposiet.
Havforsuring er eit relativt nytt forskingsfelt, så metodiske utfordringar var også tema på Austevoll.
Forsking i oppstartsfasen
Overvaking og effektstudiar er sentrale havforsuringsoppgåver både her til lands og hos amerikanarane. Effektstudiane på marine organismar er førebels få og i liten målestokk, og spesielt manglar det kunnskap om korleis havforsuringa vil påverka lågare næringsnivå som plante- og dyreplankton. Innsatsen er venta å auka på dette feltet og fleire prosjekt er i oppstartsfasen.
