Det har mangla eit komplett ”oppslagsverk” på sjøpattedyr, så rapporten ”Sjøens pattedyr” var etterlengta då han kom ut i fjor.
Den engelske versjonen kjem akkurat i tide til årets møte i den vitskaplege komiteen i IWC (Den internasjonale hvalfangstkommisjonen), som startar sin møtesesjon i Tromsø denne veka.
Arne Bjørge frå Havforskingsinstituttet er redaktør for rapporten, og med seg har han sjøpattedyrforskarar frå eige institutt, Norsk polarinstitutt og Universitetet i Oslo.
Rapporten gir ei generell innføring om sjøpattedyr, viktige evolusjonstrekk og artane som lever i norske farvatn. I tillegg inneheld rapporten sju artiklar om dagsaktuelle forskingstema og ei skjematisk oversikt over alle verdas sjøpattedyr.
Utanriksdepartementet og Fiskeri og kystdepartementet har vore med og finansiert rapporten i engelsk språkdrakt.
