Ut frå kunnskap om mengda av lakselus og rømt oppdrettslaks, samt om utskiftinga av vassmassar i Hardangerfjordbassenget, meiner instituttet at det er lite truleg at frysing av situasjonen på dagens nivå vil oppfylle formålet med forskrifta om ”Særskilt tiltak for akvakulturrelatert virksomhet i Hardangerfjorden”. Dette skriv Havforskingsinstituttet i eit høyringsbrev til Fiskeri- og kystdepartementet.
Havforskingsinstituttet foreslår utprøving av fleire ulike løysingar som kan redusere den genetiske påverknaden på vill laks og smittespreiing av mellom anna lakselus:
- Bruk av stor settefisk som vil korte ned produksjonstida i open merd og dermed gjere det lettare med effektiv brakklegging i større område.
- Bruk av lukka oppdrettsteknologi som vil fjerne smittepresset frå lakselus i delar av produksjonsfasen i sjø.
- Å vurdere bruk av steril triploid laks på einskilde lokalitar i området.
